మాస్ మహారాజ్ రవితేజ హీరోగా నటిస్తున్న తాజా చిత్రం ‘రామారావు ఆన్ డ్యూటీ’. నూతన దర్శకుడు శరత్ మండవ తెరకెక్కించిన ఈ సినిమా జూలై 29న భారీ స్థాయిలో విడుదల కాబోతుంది. నిర్మాత సుధాకర్ చెరుకూరి నిర్మించిన ఈ సినిమాలో దివ్యాంశ కౌశిక్ – రజిషా విజయన్ హీరోయిన్లుగా నటిస్తున్నారు. వచ్చే వారం విడుదలకు ఈ సినిమా ప్రచార కార్యక్రమాలను చిత్ర బృందం చాలా బాగా నిర్వహించారు.
ఈ క్రమంలో విడుదలైన పాటలకు మంచి స్పందన వచ్చింది. అలాగే తాజాగా ‘రామారావు ఆన్ డ్యూటీ’ ట్రైలర్ ను కూడా రిలీజ్ చేశారు. యాక్షన్ థ్రిల్లర్ గా తెరకెక్కిన ఈ సినిమాలో రవితేజ ప్రభుత్వ రెవిన్యూ అధికారిగా కనిపించనున్నట్లు ట్రైలర్ చూస్తే అర్థం అవుతుంది. రవితేజ నుండి ప్రేక్షకులు ఆశించే మాస్, యాక్షన్ అంశాలు ఉంటూనే థ్రిల్లర్ మరియు సీరియస్ ఎలిమెంట్స్ కూడా ఈ చిత్రంలో ఉండేలా అనిపిస్తుంది. తొలి సినిమా అయినప్పటికీ శరత్ మండవ చాలా సమర్థవంతంగా తెరకెక్కించారని సమాచారం.
హత్యలు, మిస్సింగ్ కేసుల నేపథ్యంలో నడిచే కథగా ఉన్న ఈ సినిమాలో రవితేజ సరసన ఇద్దరు హీరోయిన్లు నటిస్తుండగా.. తమిళ దర్శకుడు సామ్ సీ ఎస్ సంగీతం అందిస్తున్నారు. సినిమాటోగ్రాఫర్ సత్యన్ సూర్యన్ కెమెరా భాద్యతను చేపట్టారు. ఆర్ట్ వర్క్ విభాగాన్ని సాహి సురేష్ కు అప్పగించారు.
అయితే ఈ సినిమాలో ఆర్ట్ వర్క్ కు సంబందించిన కొన్ని ఆసక్తికర విషయాలు సాహి సురేష్ మీడియాతో చెప్పడం జరిగింది. ఈ సినిమా తొంభైల (1995) నేపథ్యంలో తెరకెక్కుతున్న విషయం తెలిసిందే. అందుకోసం నిజంగా అప్పటి వాతావరణాన్ని సృష్టించడానికి చిత్ర యూనిట్ కష్టపడిందని ఆయన తెలిపారు. అప్పటి గ్రామం, వీధులు, ఎమ్మార్వో ఆఫీస్ ల సెట్స్ ను అద్భుతంగా వేశామని, అలాగే పాటల కోసం కూడా భారీ సెట్స్ వేశారని, అంతే కాకుండా ఎమ్మార్వో ఆఫీస్ సెట్ హీరో రవితేజకు చాలా బాగా నచ్చింది అని ఆయన చెప్పడం విశేషం.